თბილისის საკრებულოში "საქპატენტისა" და საქართველოს საავტორო უფლებათა ასოციაციის ხელმძღვანელებს შეხვდნენ. თბილისის საკრებულოს თავმჯდომარე გიორგი ალიბეგაშვილი და განათლებისა და კულტურის კომისიის თავმჯდომარე თამარ ტალიაშვილი ინტელექტუალური საკუთრების ეროვნული ცენტრის "საქპატენტის" თავმჯდომარეს, ნიკოლოზ გოგილიძესა და საქართველოს საავტორო უფლებათა ასოციაციის თავმჯდომარეს, გიგა კობალაძეს შეხვდნენ. 

შეხვედრა გაცნობითი ხასიათის იყო, რომელზეც მხარეებმა საავტორო უფლებებისა და ინტელექტუალური საკუთრების დაცვასთან დაკავშირებულ პრობლემებსა თუ გამოწვევებზე ისაუბრეს და ერთობლივი გეგმები დასახეს. 

როგორც საკრებულოს განათლებისა და კულტურის კომისიის თავმჯდომარემ თამარ ტალიაშვილმა აღნიშნა, საავტორო და სხვა ინტელექტუალური საკუთრების უფლებების დაცვა ქვეყნის კულტურულ-ეკონომიკური წინსვლის საწინდარია და საკრებულო თავისი კომპეტენციით ყველანაირად შეუწყობს ხელს ამ კუთხით არსებული პრობლემების აღმოფხვრას.