კონკურისის ჩატარების მიზანი - საქართველოში ინტელექტუალური საკუთრების სფეროში ცნობიერების ამაღლების ხელშეწყობის მიზნით, ინტელექტუალური საკუთრების მსოფლიო დღისადმი (26 აპრილი) მიძღვნილი საუკეთესო მუსიკალური ნაწარმოების შერჩევა და გამარჯვებული ავტორის გამოვლენა.
კონკურსის პირობები:
კონკურსში მონაწილეობა შეუძლია საქართველოს ყველა  მოქალაქეს გარდა საკონკურსო კომისიის წევრისა და/ან მისი ახლო ნათესავისა.
თანაავტორობის შემთხვევაში, კონკურსში მონაწილეობა შესაძლებელია ავტორთა საერთო განაცხადით.
კონკურსზე წარმოდგენილი მუსიკალური ნაწარმოები უნდა აკმაყოფილებდეს შემდეგ მოთხოვნებს:

• უნდა შეიცავდეს ტექსტს და იყოს შექმნილი პირადად კონკურსანტ(ებ)ის მიერ;
• იმ შემთხვევაში, თუ ნაწარმოების შემსრულებელი სხვა პირია, კონკურსანტ(ებ)ს უნდა ეკუთვნოდეს მისი შესრულების გამოყენების განსაკუთრებული უფლება, რის თაობაზეც წარმოდგენილ უნდა იქნეს შესაბამისი დოკუმენტი (ნიმუშის ჩამოსატვირთად დააჭირეთ ამ ლინკს);
• უნდა იყოს ორიგინალური;
• მისი შექმნით, არ უნდა დაირღვეს მესამე პირების საავტორო და მომიჯნავე უფლებები;
• კონკურსანტ(ებ)ის მიერ მუსიკალურ ნაწარმოებზე საავტორო და მომიჯნავე უფლებები არ უნდა იყოს გადაცემული მესამე პირებისათვის;
• მუსიკალურ ნაწარმოებზე არ უნდა იყოს განხორციელებული სხვა ისეთი ქმედება, რომელმაც შეიძლება შეზღუდოს ან შეუძლებელი გახადოს ნაწარმოების გამოყენება ამ დებულების მე-7 მუხლით განსაზღვრული საავტორო და მომიჯნავე უფლებების მფლობელთა მიერ;
• მუსიკალური ნაწარმოების ხანგრძლივობა არ უნდა აღემატებოდეს 5 წუთს;
• მუსიკალური ნაწარმოების ტექსტი უნდა გამოხატავდეს საავტორო უფლებებისადმი პატივისცემას, მოწოდებას მისი დაცვისა და დაცვის მნიშვნელობის შესახებ. ტექსტში გამოყენებული უნდა იყოს 2015 წლის ინტელექტუალური საკუთრების მსოფლიო დღის (26 აპრილი) სლოგანი ქართულ ენაზე: ,,ხმა აიმაღლე მუსიკისთვის” (Get Up, Stand up. For Music). მისამღერი უნდა იყოს ორენოვანი (ქართული და ინგლისური) და შეიცავდეს ამავე სლოგანს ინგლისურ ენაზე: “Get Up, Stand up. For Music”. ტექსტი არ უნდა შეიცავდეს მოწოდებას ძალადობისა და დისკრიმინაციისკენ. მუსიკალური ნაწარმოები სასურველია იყოს მაჟორული და შეესაბამებოდეს ასეთი კატეგორიის მუსიკალური ნაწარმოებისადმი დამახასიათებელ მოთხოვნებს.
• მუსიკალური ნაწარმოების ჩანაწერის ხარისხი უნდა შეესაბამებოდეს მინიმალურ სტანდარტებს, რომელიც ბგერების თავისუფლად აღქმის საშუალებას იძლევა.
• კონკურსი ტარდება ერთ ეტაპად.
• საკონკურსო ნამუშევრების მიღების ვადის გასვლიდან არაუმეტეს ხუთ სამუშაო დღეში  საქპატენტის ოფიციალურ ვებ-გვერდზე (სამუშაო დღის ბოლოს) გამოცხადდება გამარჯვებული.

გამარჯვებული პროექტისთვის დაწესებული ჯილდო

• კონკურსში გამარჯვებულისათვის საქპატენტისა და საქართველოს საავტორო უფლებათა ასოციაციის მიერ, ერთობლივად დაწესებულია ჯილდო 1000 (ათასი) ლარი და მობილური ტელეფონი (სმარტფონი). კონკურსში გამარჯვებული მუსიკალური ნაწარმოები ჩაიწერება სტუდიაში და გამოიცემა CD-დისკზე, ასევე მუსიკალურ ნაწარმოებზე შეიქმნება ვიდეო რგოლი.
• ფულადი ჯილდოს ანაზღაურება ხორციელდება უნაღდო ანგარიშსწორებით, გამარჯვებულის გამოვლენიდან არა უგვიანეს ერთი თვისა.

კონკურსის მონაწილეთა საავტორო უფლებები

• გამარჯვებული ნაწარმოები წარმოადგენს ,,საავტორო და მომიჯნავე უფლებების შესახებ“ საქართველოს კანონის 43-ე მუხლით გათვალისწინებული წესით შექმნილ ნაწარმოებს, რომელზეც განსაკუთრებული ქონებრივი უფლებები სრულად ეკუთვნის საქპატენტს და საქართველოს საავტორო უფლებათა ასოციაციას.
• გამარჯვებული ნაწარმოების შესრულების გამოყენების განსაკუთრებული უფლებები სრულად ეკუთვნის საქპატენტს და საქართველოს საავტორო უფლებათა ასოციაციას.
• კონკურსში მონაწილე ყველა სხვა ნაწარმოებზე საავტორო და მომიჯნავე უფლებები რჩებათ შესაბამის ავტორებს და ნაწარმოებები მოთხოვნისთანავე უბრუნდებათ მათ.

განაცხადის წარდგენის ფორმა და ვადა

• საკონკურსო ნაწარმოები წარმოდგენილი უნდა იყოს პირადად კონკურსანტ(ებ)ის მიერ.
• საკონკურსო ნაწარმოებს კონკურსანტ(ებ)ი წარმოადგენს კონვერტით. ნაწარმოები უნდა იყოს, ჩაწერილი ნებისმიერ ინფორმაციის ციფრულ მატარებელზე, mp3 ან wav ფორმატში, რომელიც იძლევა მისი რეპროდუცირების საშუალებას, ასევე, უნდა ახლდეს ნაწარმოების ტექსტი ნაბეჭდი სახით.
• კონკურსში მონაწილეობა დასტურდება კომისიის მიერ დალუქული კონვერტის მიღებით, რაც ამავდროულად ნიშნავს, რომ კონკურსის ზემოთ ჩამოთვლილი პირობები მისაღებია კონკურსანტისათვის.
• კონვერტზე უნდა იყოს მითითებული კონკურსანტ(ებ)ის  სახელი, გვარი, მისამართი, საკონტაქტო ტელეფონი, ელექტრონული  ფოსტის მისამართი.
• კონკურსანტ(ებ)მა თან უნდა იქონიოს პირადობის დამადასტურებელი მოწმობა.
• კონკურსზე განაცხადების წარდგენის ვადა განისაზღვრულია 2015 წლის 07 აპრილიდან - 2015 წლის 15 აპრილის ჩათვლით.
• საკონკურსო ნაწარმოებების მიღების ბოლო ვადაა 15 აპრილი (2015 წ) 17:00 სთ-ი.  სამუშაო დღეებში განაცხადები მიიღება 10:00-დან 17:00 საათამდე. დამატებითი ინფორმაცია შეგიძლიათ იხილოთ საქპატენტის ვებ-გვერდზე www.sakpatenti.org.ge ან გამოაგზავნოთ კითხვები ელექტრონული ფოსტით შემდეგ მისამართზე: ipday@sakpatenti.org.ge.

განაცხადის წარდგენის მისამართია: ქ. თბილისი, რამიშვილის ქ. N4.